Sii deynta shuruud la’aanta ah ayaa timid kaddib dadaal
is daba joog ah oo socday labadii maalmood ee lasoo dhaafay si loo xaqiijiyo sii
deynta cayaaryahanka qaranka.
Weeraryahanka xulka Qaranka Saadaq Cabdul Qaadir Maxamuud
oo sidoo kalana u cayaara kooxda heerka 1-aad ee dalka Kenya ee la yirahado AFC
Leopards ayaa la qabtay xili habeenkii Arbacada uu ka baxay hoygiisa si uu usoo
daawado cayaar ka tirsan horyaalka kooxaha Yurub (European champions League) ee
dhex mareysay Atletico Madrid iyo Barcelona, hase ahaatee ciidamada ayaa dhex u
galay kaddibna xiray.
"Waxaan ka rajeyneynaa maasuuliyiinta dalka Kenya inay
xushmeeyaan cayaartoyda caalamiga ah ee dalkooda ka dheela gaar ahaana kuwa Soomaalida
oo si gaar ah masuuliyadoodu anaga noo saaran tahay”ayuu war saxaafadeed uu
xalay soos saaray ku sheegay xoghayaha guud ee xiriirka Soomaaliyeed ee kubada
cagta Cabdi Qani Saciid Carab isagoona soo dhaweeyay sii deynta cayaaryahanka.
Waxaa xoghayaha guud uu uga
mahad celiyay ciidamada Kenya sida wanaagsan oo ay ula dhaqmeen cayaaryahanka
mudadii ay heysteen inkastoo uu sheegay in xiritaankiisu uu ahaa talaabo aad u
qaldan.
Goor sii horeysay jimcihii
ayaa xiriirka Soomaaliyeed ee kubada cagta qoraal uu soo saaray waxaa uu ku
sheegay in aanu aqbali kareynin in cayarayahankaasi uu habeen sadexaad kusii
baryo xabsiga, waxaana xiriirka Soomaaliyeed uu qoraalo ashtako ah oo ka dhan
ah dowlada Kenya u kala diray ururka kubada Cagta aduunka ee FIFA, kan qaarada
Afrika ee CAF iyo kan bariga iyo bartamaha Afrika ee CECAFA si cadaadis loogu
saaro dowlada Kenya in cayaaryahanku aanu habeen sadexaad xabsiga ku baryin.
Dhanka kale cayaaryahan
Saadaq Cabdul Qaadir Maxamuud oo la hadlay xafiiska warfaafinta CECAFA ayaa ka
war bixiyay waayihiisii xabsiga waxaana uu sheegay in si wanaagsan loola
dhaqmay kadib markii uu ciidamada u sheegay in uu yahay cayaaryahan kubada
cagta oo caalami ah kana tirsan xulka qaranka Soomaaliya.
"Ka sokow in aan ahaa nin
xabsi ku jira, hadana waxaa runtii ahaantii aan kuu sheegi karaa in ciidamada
amaanku qadarin weyn ii muujiyeen, ugu dambeyntiina gaari qaas ah ayay igusoo
qadeen oo gurigeyga igu keeneen”ayuu yiri cayaaryahan Saadaq oo intaa raaciyay
in uu caafimaad ahaan wanaagsan yahay.
Cayaaryahanka ayaa xafiiska
warfaafinta CECAFA la hadlay wax yar kaddib markii xalay gurigiisa uu si nabad
ah ugusoo laabtay.
