Sida ku cad jadwalka maanta la sii daayay, naadiga
ciidanka Booliska Soomaaliyeed ee Heegan ayaa la kulmi doonta naadiga Savana
maalinta Khamiista ah, halka Maalinta Jimcahana ay is haleeli doonaan Banadir
Sports Club iyo Dekedda.
Labada cayaarood ee Jeenyo VS Elman iyo B.S.C VS Dekedda
ayaa la saadaalinayaa in ay noqon doonaan labada cayaarood ee ugu ad-adag
todobaadka dib u furidda horyaalka dalka. Tartankan ayaa ka bilaaban doona cayaarta 8-aad, oo ah
halkii markii hore lagu joojiyay sida ku cad isku aadka maanta la sii daayay.
Horyaalka ‘Nation Link Telecom Championship’ oo ah tartan
isboortiyeedka ugu shacbiyadda badan dalka ayaa la hakiyay bishii November ee
sanadkan sababo la xariira xulka qaranka oo cayaaro ku lahaa dalka dibadiisa,
sida lagu sheegay war saxaafadeed uu maanta soo saaray xoghayaha guud ee
xiriirka Soomaaliyeed ee kubada cagta Mudane Cabdi Qani Saciid Carab.
"Jadwal sanadeedkii 2013 ee xulka Qaranka Soomaaliya ‘Ocean
Stars’ wuxuu soo gaba-gaboobay muddo qiyaastii
laba usbuuc ka badan laga joogo, laakin guddiga fulinta xiriirka Soomaaliyeed
ee kubada cagta ayaa go’aamiyay in tartanka dib loo amba qaado kaddib marka aan
ka fara-xalano shir sanadeedka xiriirka oo qorsheysan in uu ka dhoco magaalada
Caasimada ah 30-ka bishan December”ayuu war saxaafadeedkiisa ku yiri xogyaha
guud ee xiriirka Soomaaliyeed ee kubada cagta Mudane Cabdi Qani Saciid Carab.
Cayaar isboortiyeedka dalka ugu shacbiyada badan waxaa xilli
cayaareedkan lagu soo bandhigayaa garoon heer caalami ah, waana taas tan sii
kordhisay taagerayaasha kubada cagta dalka, iyadoo qof kasta uu haminayo bal in
uu mar uun dhex istaago garoon leh cows-ka Artificial Turff-ka”ayuu war saxaafadeedkiisa
ku sheegay xoghaye Cabdi Qani Saciid Carab maanata oo Axad ah.
"Garoonka Banaadir waxaan maalin kasta ku aragnaa dhalin
yaro aad u fara badan oo FIFA iyo Xiriirka Soomaaliyeed uga mahd celinaya howshan
weyn ee la qabtay, iyadoo qaarkood lagaba yaabo in aysan ogeyn waxa lagasoo
gaabiyay erayga ‘FIFA’ laakin ay warbaahinta ka maqleen oo keliya in FIFA
garoonkan u dayactirtay Soomaaliya”ayaa lagu yiri war saxaafadeedka xoghayaha
aguud Cabdi Qani Saciid Carab.
War saxaafadeedka ayaa lagu amaanay warbaahinta gudaha
iyo tan dibada oo runtii waqti badan siiyay soo tebinta horyaalka dalka oo
xiisihiisu uu iminka kusii kordhayo dadweynaha Soomaaliyeed ee ku kala sugan
gudaha iyo dibada”ayaa lagusoo gaba-gabeeyay war saxafaadeeka maanta oo Axad ah
uu soo saaray xoghayaha guud ee Xiriirka Soomaaliyeed ee Kubada cagta Mudane
cabdi Qani Saciid Carab.
Somali Football Federation Media Department
Email:Somalifootballmedia@gmail.com