Shabakadan
oo markeedii hore hawada kusoo biirtay sanadkii 2008-dii ayaa hada lagu
sameeyay dib u casriyeyn waxaana shabakada wararka xiriirka Soomaaliyeed ee kubada
cagta ay noqotay tan ugu bilicda san dhamaan shabakadaha wadamada xubnaha ka ah
ururka kubada cagta aduunka.
Dad
fara badan oo Soomaaliyeed oo wax weyn ka yaqaana arimaha website-yada ayaa si
weyn usoo dhaweeyay dib u casriyeynta lagu sameeyay shabakada wararka xiriirka
Soomaaliyeed ee kubada cagta oo ah mid laba luqadle ah Af Soomaali www.somsoccer.com/somaliiyo Af ingiriis www.somsoccer.com/english.
Guddoomiyaha
ururka saxafiyiinta Isboortiga Soomaaliyeed Cabdi Casiis Goodax Barre oo ka
mida xeel dheerayaasha dhinaca saxaafada ayaa sheegay in website-kani uu yahay
kii ugu horeeyay ee Soomaaliyi leedahay oo sidan oo kale u horumarsan oo
wligiis uu booqday.
"Runtii
waa website aad u qurux badan oo si weyn la isugu howlay dhismihiisa iyo
macluumaadka lagusoo kordhiyay intaba—waa shabakad wax weyn u tareysa ardayda
Soomaaliyeed ee dooneysa in ay horumarin ku sameeyaan luqadooda English-ka
maadaama uu website-ku leeyahay luqado isku fasirmaya, wuxuuna ardayda ka
saacidayaa dhanka kororsiga eryada luqada English-ka”ayuu yiri Cabdi Casiis
Goodax Barre.
Xoghayaha
xiriirka Soomaaliyeed ee kubada cagta Cabdi Qani Saciid Carab ayaa sheegay in
tan iyo 2008-dii shabakadani ay kaalin weyn ka cayaartay in ay caalamka ugsoo
tebiso dhacdooyinka la xriira horumarinta kubada cagta dalka Soomaaliya hadana
xiriirku ku dadaalay in uu sii horumariyo.
"Shabakadani
waxay ka tarjumeysaa muuqaalka dhabta ah ee xiriirka Soomaaliyeed ee kubada
cagta, waxaana loogu tala galay in bulshada Soomaaliyeed meel kasta oo ay
joogaan iyo guud ahaan bulsho weynta caalamku ay si isku mid ah ugala socdaan
kubada cagta Soomaaliya”ayuu yiri xoghayaha guud eexiriirka Soomaaliyeed ee
kubada cagta Mudane Cabdi Qani Saciid Carab.
"Shan
sanadood ka hor wuxuu xiriirka Soomaaliyeed ku guuleystay in uu noqdo hey’adii
is boorti ee ugu horeysay Soomaaliya oo yeelata website u gaar ah oo wax
qabadkeeda lagusoo bandhigo, hadana waxaan aad ugu faraxsanahay in shabakadani
ay noqotay tii ugu muuqaalka wanaagsanayd shabakadaha dalalka nagula jira
FIFA”ayuu yiri xoghayaha Guud Cabdi Qani Saciid Carab.
Shabakadan
ayaa waxaa dhistay shirkada Ileys.so, oo ah shirkada ugu balaaran geeska Afrika
ee bixisa adeegga la xiriira website-yada fadhigeeduna yahay magaalada Muqdisho
isla markaana xarumo ku leh magaalooyin ay ka mid tahay Hargeysa.
Shirkada
Ileys iyo xiriirka Soomaaliyeed ee kubada cagta ayaa isku afgartay in labadii
sanadoodba mar dib u habeyn lagu sameeyo dhismaha shabakada wararka xiriirka,
si mar kasta ay u ahaato mid soo jiidata indhaha dadka ka soo boqoanaya
caalamka daafihiisa.
Aasaasaha
shirkada Ileys ahna maamulaha Enjineer Cabdiraxmaan Sheekh Ciise (Kumi) ayaa
sheegay in dadaal badan iyo waqti ay geliyeen shabakadan ayna ku guuleysteen in
ay ka dhigaan mid aad u horumarsan oo nooceeda oo kale aanay wali horay u
sameyn oo soo jiidaneysa indhaha iyo dareenka cid kasta oo soo booqata.
"Mar
kasta waxaan jecelnahay in shabakada xiriirku ay ka horumarsanaato shabakadaha
dalalka kale ee dhigeena ah waxaana balan qaadeynaa in laba sanadood kaddib ay
sii ahaato horyaalka website-yada xaga naqshada marka loo eego”ayuu yiri
maamulaha guud ee shirkada Ileys.so Mudane Cabdiraxmaan Sheekh Ciise oo ku
magac dheer kumi yare.
Xoghayaha
guud ee xiriirka Soomaaliyeed ee kubada cagta Mudane Cabdi Qani Saciid carab
ayaa sheegay in website-kan ay ka shaqeeyaan dhalinyaro aad u fir fircoon oo
xiriirku uu soo barbaariyay laga bilaabo wax barashadoodii hoose ilaa iyo tii
jaamacada, waxaana aad ugu faraxsanahay in dad xiriirku abuurtay ay maanta
shabakadan ka shaqeynayaan”ayuu hadalkiisa sii daba dhigay xoghayaha guud Cabdi
Qani Saciid Carab.
Bishii
September 2011-kii ayaa xiriirka kubada cagta ee qaarada Africa ee CAF wuxuu u
aqoonsaday waaxda warfaafinta xiriirka Soomaaliyeed ee kubada cagta tan ugu fir
fircoon dhamaan dalalka 50 iyo dhowrka ah ee Afrika ay ka kooban tahay.
Xogyahaya
Guud ee ururka kubada cagta ee Africa Hicham El Amrani ayaa xiligaas qoraal uu
usoo diray madaxa xafiiska warfaafinta xiriirka Soomaaliyeed ee kubada cagta
waxaa uu ku amaanay shaqada waaxda warfaafinta xiriirka oo uu sheegay in ay
Afrika ka gashay kaalinta 1-aad kuna booriyay in shaqadaas ay sii laba
jibaaraan.
"Ururka
kubada cagta Africa ee CAF wuxuu aad ugu faraxsanyahay shaqada waaxda
warfaafinta xiriirka Soomaaliyeed ee kubada cagta ay u heyso xiriirka CAF oo
Soomaaliya ay noqotay dalka qoraallada ugu badan nasoo gaarsiiya waana idinku
amaaneynaa howl-karnimadaas”ayuu xoghayaha guud ee CAF ku yiri dhambaal uu soo
gaarsiiyay xafiiska warfaafinta xiriirka Soomaaliyeed ee kubada cagta 8-dii
bishii September 2001-dii.
Waxyaabaha
Soomaaliya lagu amaanay waxaa kale oo ka mid ahayd in xiriirka Soomaaliyeed ee
kubada cagta uu noqday xiriirkii ugu horeeyay Africa ee soo saara buug ku qoran
afka English-ka oo ka hadlaya waxqabadka xiriirka ee sanadka.
Buugan oo cadadkiisii ugu horeeyay lasoo saaray sanadkii 2011 ayaa ah mid sanadle ah oo lagusoo bandhigo dhamaan shaqooyinka xiirka ee sanad kasta iyadoo wali uusan jirin dal ka mida dalalka xubnaha ka ah ururka kubada cagta Africa ee CAF oo soo saaray buugan oo kale.
Somali Football Federation Media Department
Email:somalifootballmedia@gmail.com